Ве информираме дека првото авио-третирање против комарци во општините Богданци, Валандово и Дојран е планирано да се изврши на 27.06.2019 година – четврток, во раните утрински часови, односно во период од 04:30 до 09:30 часот.
Доколку временските услови не дозволат да се реализира прскањето, истото ќе се спроведе на 28.06.2019.
Се известуваат пчеларите навремено да ги преземат потребните мерки за заштита на пчелите.
Градоначалникот на општина Дојран беше поканет и присуствуваше на одбележувањето на патрониот празник на О.О.У “Кочо Рацин” во Нов Дојран.
Заедно со директорката на училиштето положија свежо цвеќе и се поклонија пред бистата на големиот Коста Солев Рацин, потоа ја проследија културно уметничката програма подготвена од учениците.
Градоначалникот Ангов додели вредносни ваучери на двајца ученици кои се натпреваруваа и освоија прво и второ место на државни натпревари и пофалници и благодарници на заслужни ученици за постигнати успеси на регионални и училишни натпревари.
Благодарност до наставниците и учениците за прекрасната организација.
Имајте успеси во иднина и бидете позитивни промотори на училиштето и на општина Дојран.
Општина Дојран ја имаше честа да биде домаќин на мултидисциплинарен тим на експерти и да зборува за теми кои ги засегаат најмладите членови на општеството.
Дојран беше центар за обука на ученици и наставен кадар. Имено, во основното училиште се одржа семинар на тема “Превенирање на насилното однесување меѓу учениците во онсовните училишта” и со истиот беа опфатени наставници во одделенска и предметна настава, како и стручни соработници од подрачните училишта на територијата на нашата општина.
Семинарите се реализираа благодарение на универзитетските професори: Дејан Мицковиќ (доктор по правни науки), Татјана Стојановска – Иванова (доктор по социолошки науки), Ана Фрицханд (доктор по психолошки науки) и Елизабета Томевска – Илиева (доктор по педагошки науки).Истите беа со интерактивен карактер, динамична комбинација и едукативни и за наставниците и за родителите кои присуствуваа на обуката.
Слушателите на обуката во основното училиште се здобија со знаења за правата на децата, за правните, психолошките и педагошките аспекти на насилството и малтретирањето во училиштата, како и за можноста за рано препознавање и намалување на насилството во школите.
Од страна на Институтот се одржа обука и во хотелот “Романтик”, во соработка со детската градинка “Кокиче” на тема “Ран детски развој” наменета за професионален развој на воспитувачите, родителитите и за одделенските наставници, односно за онаа група на едукатори кои ги пречекуваат децата на нивниот премин од градинка во задолжителното основно образование.
Општина Дојран изразува голема благодарност до едукаторите на настаните во образовните институции во Дојран. Со вчерашните обуки, но и оние кои ќе се спроведат во иднина – нивото на квалитет на работа во образованието ќе се издигне на повисоко ниво.
На крајот од обуките сите учесници добија сертификати за учество кои се доделија на церемонија на терасата од хотелот “Романтик” во Стар Дојран.
Институтот за европски образовни, социо-културни и економски политики ЕВРОПА ЗА ТЕБЕ Скопје и општината Дојран вчера во просториите на Општина Дојран потпишаа меморандум за соработка.
Заедничка цел на двете страни е да спроведуваат истражување, креирање, развој и промоција на европски образовни, социо-културни и економски политики на национално и меѓународно ниво, со посебен акцент на унапредувањето на образовниот, економскиот, културниот и општествениот статус на сите категории на граѓани (децата, младите и возрасните).
Во оваа смисла, Институтот за европски образовни, социо-културни и економски политики ЕВРОПА ЗА ТЕБЕ Скопје и општина Дојран, покажаа интерес да изградат партнерство во спроведување на конкретни проектни активности со намера да ги остварат заедничките цели преку реализирање на взаемни проекти во сферата на образовниот, економскиот, социо-културниот и општествениот живот.
Страните се сложија да воспостават блиска соработка за остварување на своите програмски определби и цели.
Соработката ќе се одвива преку аплицирање и учество во проекти чија цел е унапредување на едукативните, економските и социо-културните услови во С. Р. М со посебен акцент врз унапредувањето на економскиот, културниот и општествениот статус на граѓаните на национално и меѓунационално ниво, согласно плановите и програмите на двете страни.
Почитувани,
на ден 26.04.2019та година околу 11.30 минути во полициската станица во Нов Дојран е пријавена кражба на четири бисти од познати македонски дејци поставени во Градскиот парк во Стар Дојран веднаш до општинската зграда. Увид на лице место е извршено од службени лица од полициската станица Нов Дојран и Гевгелија, составен е записник од нивна страна и направени се фоографии од местото на кражбата.
Истрагата за кражбата е во тек, во соработка со МВР се надеваме дека сторителите многу брзо ќе бидат пронајдени и соодветно санкционирани. Спомен – бистите на Теодосиј Синаитски, Антон Панов, Христофор Жефаровиќ и Ѓорги Абаџиев се значајни за Општина Дојран и за граѓаните од општината. Очекуваме истите набрзо повторно да се најдат во Градскиот парк во Стар Дојран каде што и припаѓаат.
Општина Дојран беше домаќин на Креативна работилница за фотографија на која учествуваа деца од малите групни домови кои се дел од процесот на деинституционализација. Децата имаа можност низ дружба и со фотографирање на убавините на градот и на Дојранското езеро да ги учат техниките за фотографирање.
Автор на фотографијата е Р.С
Акција за чистење и разубавување на Дојран со помош на Ирена Ристиќ и #НебидиЃубре
Благодарност до сите учесници, се надевам дека во иднина ваквите акции ќе прераснат во навика, но и задоволство.
Дојран заслужува да биде чист.
Во тек се градежни активности за изградба на спортска сала во О. О. У. “Кочо Рацин” Нов Дојран.
Децата, нивната среќа и добросостојба остануваат врвен приоритет во работата на општината.
