Новости

Нова велосипедска патека во Дојран за љубителите на off road велосипедизмот

Со проектот за проширување на велосипедската патека во општина Дојран, долж фронтовата линија од Прва светска војна, финансиран од Југоисточниот плански регион, Општина Дојран наскоро ќе се најде на мапата на љубителите на off road велосипедизмот или популарно наречениот mountain bike (планински велосипедизам).
Во склоп на овој проект се врши машинско порамнување на постојната траса со проширување и на одредени места со пробивање на нова траса.
Патеката е во должина од 16 км. А она што е мошне примамливо е тоа што за истата ќе бидат набавени соодветни патоказни знаци за насочување низ трасата. Поставување на летниковци, дрвени клупи, канти за отпадоци е само мал дел од опремата која е планирано да се постави долж велосипедската патека.
Благодарение на овој проект, во Општина Дојран, освен класичниот езерски туризам ќе се развиваат и алтернативни форми на туризмот како што е off road велосипедизмот, за што ние како општина особено се залагаме. Со оваа инвестиција ќе имаме зголемен број на активности, ќе се организираат рекреативни тури, како и спортски натпревари кои во иднина ќе придонесат голем број на вљубеници на велосипедизмот да се приближат кон природата, да рекреираат, но и подобро да ги запознаат природните убавини и богатата историја која ја нуди на нашиот Дојран.
Здравствените придобивки од возење велосипед по off road патеки се неколкукратно поголеми од возење велосипед по регуларни патеки.
Како голема награда за вашиот напор е величествениот поглед кон Дојранското Езеро, недопрената природа која го одзема здивот, богатство на ендемични флора и фауна. Попатно може да вкусите и од шумските плодови кои природата несебично ги дава.
Наскоро ќе може да нѐ посетите во Дојран и да добиете ново искуство од вашиот престој овде.

Дипломатски економски караван

Преку организирање дипломатско-економски караван во Југоисточниот плански регион, Општина Дојран денес ги презентираше можностите за инвестирање и потенцијалите пред економски аташеа и амбасадори на 17 дипломатски претставништва во земјата и од други држави кои ја покриваат нашата земја.
Општина Дојран визуелно, преку промотивни видеа ги промовираше убавините со кои располага и можностите за инвестиции.
Гостите покажаа интерес за инвестиции во туризмот, можностите за пласирање на нашите локални производи во земјите од кои доаѓаат и секако изразија воодушевување од природните убавини кои ги нуди нашиот Дојран.
Се надеваме дека економскиот дипломатски караван во блиска иднина ќе донесе инвестиции и дополнително ќе го забрза економскиот развој на нашата општина.

Нов циклус на обуки за основците по програмата за родова еднаквост на Општина Дојран

Локалниот акционен план за родова еднаквост кој беше презентиран и усвоен од страна на Советот на Општина Дојран на 24тата седница одржана на 30.01.2023та година предвидува нов циклус на обуки за спречување на врсничкото и родово базираното насилство, серија на работилници за млади – справување со стрес, анксиозност, препознавање на сопствените емоции, насочување при избор на одбирање соодветно средно образование според можностите и капацитетот на детето, Младинско учество за силен и одржлив развој на заедницата, односно учество на млади, деца на училишна возраст во случувања кои се организираат во поголемите градски средини, како и бесплатни логопедски и дефектолошки прегледи кај деца од предучилишна и училишна возраст.

На воведната сесија во подрачното училиште во село Црничани, децата беа запознаени со планот за родова еднаквост, односно активностите кои може да ги очекуваат од страна на стручен тим во наредниот период.

Интересот на децата за учество во работилниците и обуките е евидентен, а заинтересираност покажува и самиот наставен кадар во училиштата.

Изминатата календарска година се одржаа десетици работилници за ставање крај на булингот, однсоно врсничкото насилство, како и обуки за спречување на малолетнички бракови.

Евалуацијата од страна на стручниот тим од Центарот за социјални работи – Гевгелија, како и од страна на наставниот кадар во О.О.У “Кочо Рацин” Нов Дојран е дека работилниците, односно обуките имало влијание врз децата и истите се полезни за нив.

Охрабрени од минатогодишното искуство, годинава за доброто на децата повторно се организираат обуки и работилници кои ќе бидат во нивна корист.

Годишниот план за родова еднаквост е прикачен на оваа ВЕБ страница и истиот детално може да го прочитате.

 

 

Потпишан меморандум за соработка помеѓу Општина Дојран и Меѓународен Балкански универзитет Скопје

Водејќи се од познатата мисла на Џорџ Вашингтон која вели дека образованието е златен клуч на слободата, на покана на раководството на Меѓународниот балкански универзитет во Скопје, градоначалникот на Општина Дојран, Анго Ангов оствари средба со вице ректорите проф. д-р Mevludin Ibish, проф. д-р Serdar Serdarogu, проф. др. Александра Појразоска – Кујунџиски, проф. д-р Александар Андовски и асс. Надица Ангова Колевска.
На обострано задоволство потпишан е меморандум за соработка помеѓу Општина Дојран и Меѓународниот балкански универзитет.
Она што особено радува и даде посебен акцент на средбата се понудените 10 стипендии за студирање на универзитетот за талентирани ученици од Општина Дојран.
Покрај тоа, студенти на архитектура од МБИ под менторство на своите професори ќе изготвуваат проекти за нашата општина. Проекти со кои потоа директно ќе можеме да се аплицира за средства од различни фондови и истите реално да се имплементираат.
Соработката со Меѓународниот балкански универзитет во иднина е планирано да се продлабочува во повеќе сегменти.
Квалетитеното образование е најмоќното оружје кое може да го употребиме за да го промениме светот,а несомнено е дека Меѓународниот балкански универзитет има стручен кадар и капацитет да понуди одлично образование.

Општина Дојран на престижниот саем за туризам во Белград

На вториот ден на саемот за туризам во Белград, градоначалникот Ангов имаше можност да се сретне со државниот секретар на Министерството за туризам и млади – г-дин Урош Кандиќ.
Беше разговарано на повеќе теми, но главниот акцент е ставен на туризмот и потенцијалот кој го има Дојран. Разговарано е за она кое е интересно да се понуди на српските тур оператори како би привлекле повеќе туристи токму во нашиот бисер – Дојран.
Презентирани се бројните туристички капацитети со кои располагаме,започнувајќи од хотелите, приватните апартмански сместувања, бунгаловите и можноста за кампинг туризмот.
Спомената е можноста за дополнителна промоција и соработка надвор од саемските денови, како и опционално да се вклучат повеќе тур оператори, се со цел да се привлечат повеќе туристи во нашиот Дојран надвор од летната туристичка сезона.
Самиот државен секретар истакна дека овогодинешниот саем за туризам во Белград е одлична можност за промоција на Општина Дојран, а истиот генерално ќе биде насочен кон зајакнување и обновување на туристичката средина, како и промоција на трендови и иновации кои ќе ја обликуваат иднината на туристичката индустрија.
Со учество на овогодинешниот 44ти саем за туризам во Белград ќе започне бран на нова енергија за туризмот во регионот. Преку воспоставување контакти и вмрежување на учесниците ќе се следи правецот на постигнување подобри бизнис, односно туристички резултати за нашиот прекрасен Дојран.

Општина Дојран се приклучува кон донаторските акции за помош на Р. Турција и Сирија

Општина Дојран активно се приклучува кон акциите за донации за настраданите во катастрофалниот земјотрес кои ги погоди Р. Турција и Р. Сирија.

Од 14.02.2023та година до 17.02.2023та година (вторник до петок) сите граѓани кои сакаат да донираат ќебиња, топла зимска облека, средства за хигиена, конзервирана храна и слично, донациите може да ги донесат во просториите на Општина Дојран во периодот од 10.00 до 15.00 часот.

Да бидеме хумани и да помогнеме на семејствата на настраданите лица, како и на многубројните граѓани кои останаа без своите домови во разорниот земјотрес од 06.02.2023та година.
Собраните донации во Општина Дојран ќе се испратат до Црвениот Крст на Р. Северна Македонија. Понатаму, преку транспортни компании, сите, по сотритрање, ќе бидат доставени до најпогодените семејства во Турција и Сирија.

Работна средба помеѓу амбасадорката на соседна Р. Грција и Градоначалникот на Општина Дојран

Денеска во работна посета на Општина Дојран беа Н.Е Sophia Philippidou, Амбасадор на Р. Грција во Р. С. Македонија и Maria Diagounma, раководител на конзуларното претставништво во Амбасадата на Р. Грција во нашата земја.
​На едночасовната средба, се отворија повеќе теми на разговор, но најважно од се беше обостраната подготвеност за продлабочување на добрососедските односи помеѓу двете земји. Прекугранична соработка на ИПА проекти, заедничко аплицирање за средства од фондовите на Европската Унија и секако, грижата за добросостојбата на Дојранското Езеро се врвни приоритети за нашата општина и токму затоа најпрво се отвори дискусија за овие прашања.
Амбасадорката беше запознаена со странските инвестиции во нашата општина, можностите за инвестирање, туристичките потенцијали, бројот на грчки граѓани кои секојдневно поминуваат низ граничниот премин Дојран и детали за нашата соработка со општините Серес и Кукуш од грчка страна.
Ќе се разгледа можноста за соработка во полето на здравствената заштита, исто така ќе се превземат конкретни чекори за унапредување на соработката помеѓу двете држави, а особено помеѓу општините кои се директно засегнати за добросостојбата на езерото.

Честитика по повод Бадник и Божиќ

Драги мои сограѓани,

Кога се честита од срце, без исклучок, секогаш се пишуваат најубавите зборови.

Нека овие големи  православни празници во вашиот дом донесат мир и благосостојба. Божиќ е најсветиот и најрадосниот христијански празник, празник на семејството и мирот, празник на Христовото раѓање, додека Бадник е предвесник на големиот христијански ден, сплотувајќи ги најблиските на бадниковата трпеза.

Нека Бадниковата вечер и Божиќ внесат топлина во домовите и семејствата, а доброто здравје, духовниот мир и меѓусебното разбирање царуваат во Вашите срца.

Да се радуваме со нашите сакани, да останеме сплотени и истрајни во сите предизвици, да споделиме со блиските, да љубиме и да се почитуваме од срце.

 

Среќен Божиќ, Христос се роди!

Новогодишен базар 2022

Дел од амбиентот на овогодинешниот базар кој се одржа во градскиот парк во Стар Дојран. На настанот со свои ракотворби, но и со соодветна новогодишна програма учествуваа децата од О.О.У “Кочо Рацин” Нов Дојран и децата од ЈОУДГ “Кокиче” Нов Дојран.
Задоволството на сите присутни беше очигледно.
Радост, детски насмевки и присуството на омилениот Дедо Мраз го одбележаа овогодинешниот новогодишен базар.

Изгласан Буџетот на Општина Дојран за 2023та година

Главна цел на општина Дојран е да служи во корист на граѓаните и да ги застапува нивните интереси и приоритети. Затоа со учество на граѓаните, преку испраќање на своите идеи и предлози го изработивме буџетот на општина Дојран за 2023 година.
Со 8 (осум) гласа ЗА и 1 (еден) воздржан беше изгласан Буџетот за 2023 година.
Буџетот e развоен со развојни компоненти и многу капитални инвестиции кои го следат трендот на раст и развој на општина Дојран, а воедно ќе придонесат за подобрување на квалитетот на животот на граѓаните и развој на општината.
Годинава, Буџетот на општината има развојна компонента, 70% од Буџетот е за развојни цели, додека 30% се определени за тековно – оперативни трошоци.
Општина Дојран, заедно со сите населени места, со новиот буџет сигурно чекори кон својот нов, модерен лик.
✅Граѓански буџет
✅Од граѓаните, за граѓаните