Новости

Порибување на Дојранското Езеро

Градоначалникот на Општина Дојран г-дин Анго Ангов, Директорот на земјоделскиот инспекторат г-дин Зоран Шапуриќ заедно со претставници од Министерството за земјоделство, шумарство и водостопанство извршија порибување на Дојранското Езеро.

Согласно одредбите од Законот за рибарство и аквакултура, порибувањето претставува добро од јавен интерес во областа на рибарството. Порибувањето на риболовните подрачја и риболовните зони го врши Министерството за земјоделство, шумарство и водостопанство  преку регистрирани репроцентри.

Водите на Дојранското езеро се порибуваат согласно риболовата основа за риболовното подрачје Дојранско Езеро.

Заради зачувување и зголемување на рибниот фонд, Владата на Република Македонија, во годишните програми за финансиска поддршка предвидува мерки и обезбедува финансиски средства за изведување на вештачки мрест и порибување на риболовните подрачја и риболовните зони.

И оваа година во Програмата за финансиска поддршка во рибарството и аквакултурата е предвидена мерка за порибување на Дојранското Езеро со средства во вкупен износ од 800.000,00 денари. За изведување на порибувањето министерството склучи договор со регистрираниот репроцентар Акватика ДООЕЛ – Неготино кој имаше обврска да произведе 50 000 единки подмледок од крап меѓу 7 и 15 грама согласно динамиката на активности.

Инаку, Дојранското Езеро и во изминатиов период (2011-2015 година) беше порибувано со околу 1500 килограми подмладок од крап на годишно ниво, во зависност од обезбедените средства и порибителен материјал. Порибувањето го реализираа регистрираните репроцентри УКИМ Институт за сточарство – Скопје и Акватика ДООЕЛ – Неготино.

Сето ова претставува реализација на заложбата на Владата на Република Северна Македонија и Министерството за земјоделство, шумарство и водостопанство, за достигнување на резултатите од времињата кога, според податоците, Дојранското Езеро беше регистрирано како едно од најпродуктивните езера во Европа.

 

Работен состанок

Денес градоначалникот Ангов во конференциската сала на хотелот ХИТ во Стар Дојран беше организатор и домаќин на работен состанок на кој присуствуваа претставници од амбасадите на Франција и Бугарија, претставници од Н.У Завод и музеј Струмица, учесници од Министерството за одбрана, претставнички од воениот музеј – Скопје и НВО здруженија.
Гостите претходно го посетија и музејот посветен на Првата Светска Војна.
Целта на состанокот беше да се стави во употреба за туристички цели патеката од Првата Светска Војна, односно да се приспособи дел од дојранскиот фронт и да се понуди како дополнителна туристичка атракција на потенцијалните заинтересирани домашни и странски туристи.
Интересот за фронтовата линија, воената историја на Дојран и настаните од минатото кои се одвивале токму под ова поднебје изминатите години се навистина многу актуелни кај странските посетители на нашата општина.
Идејата е да се оплемени дел од патеката, да се разработи стратегија и конечно фронтовата линија да започне да функционира како вистинска туристичка атракција, со одобрение од општината и со лиценцирани и обучени туристички водичи.
На состанокот беше донесена одлука да се формира координативно тело со претставници од сите институции и наредниот период интензивно да се аплицира за средства од најразлични фондови и да се работи на ставање во функција на патеката од Првата Светска Војна.
Се надеваме дека во блиска иднина општина Дојран ќе понуди уште една атракција, која ќе биде поинаква, поучна и примамлива за домашните и странски посетители.

 

Соопштение за одржување на јавна консултација на план за управување со животна средина

 

Соопштение за одржување на јавна консултација на план за управување со животна средина за   “Потпроектот Дојран – туристички бисер на Југоисточна Македонија

Октомври  14, 2019год.

Ве информираме дека на 28.10.2019 (понеделник) ќе се организира ЈАВНА КОНСУЛТАЦИЈА  на План за управување со животна средина во рамки на проектните активности на “Потпроектот Дојран – туристички бисер на Југоисточна Македонија“,преку единицата за спроведување : Проект за локална и регионална конкурентност – LRCP,каде што се вклучени  повеќе активности, дадени во продолжение:

  • Партерно и хортикултурно уредување на Зелена рекреативна зона – Градски парк Дојран
  • Санација на оштетени делови на Отворена летна сцена
  • Асфалтирање на улица до Отворена летна сцена
  • Партерно и хортикултурно уредување на Отворена летна сцена

 

Финансирањето на овој проект е обезбедено со средства од меѓународни финансиски институции (Светска Банка), според чии барања во делот на заштита на животната средина и социјалните аспекти, , потребно е да се организира јавна консултација со засегнатите страни и локалното население.

Планот за управување со животната  средина за “Потпроектот Дојран-туристички бисер на Југисточна Македонија“ е достапен на увид во просториите на општина Дојран како и на официјалната веб страница www.opstinadojran.gov.mk.

Јавната консултација  ќе се одржи во: Општинa Дојран на 28.10.2019 година (понеделник) со почеток во 13 часот во салата за состаноци  на општина Дојран.

Лице за контакт:

Општина Дојран

Мито Велчев

Тел.034 – 225 -278

Е-mail:dojran@t.mk

 

Сите формулари на македонски, англиски и албански јазик, како и планот за управување со животната средина
“Дојран – Туристички бисер на Југоисточна Македонија“ на македонски, англиски и албански јазик може да ги најдете на следниот линк:

https://dojran.gov.mk/documents/

Европска недела на спортот во Дојран

Вчера, 29.09.2019та година на плоштадот под јаворите во стар Дојран се одржа рекреативен настан во рамки на “Европската недела на спортот.” Храни се здраво и живеј здраво беше мотото на Европската недела на спортот која особено внимание посветува на здравата исхрана како предуслов за здрав и квалитетен живот! Учесниците кои беа дел од настанот се забавуваа, добија награди и беа сведоци на многу изненадувања.

Еко акција во Стар Дојран

Во сабота на 21.09.2019та година ќе се спроведе акција за чистење и разубавување на централното градско подрачје во Стар Дојран. Сите заинтересирани граѓани, ученици, претставници од фирми, институции и граѓански организации кои сакаат да учествуваат во акцијата се поканети во 08.00 часот да дојдат на плоштадот под јаворите од каде и ќе почне акцијата.
Целта на акцијата е да се подигне свеста кај граѓаните за здрава и чиста животна средина кај сите возрасни групи и преку сопствен пример да се покаже грижа за заштита на животната средина.

Реконструкција на подрачни училишта во Општина Дојран

Подрачните објекти на основното училиште “Кочо Рацин” во селата Фурка, Николиќ и Црничани беа реконструирани, хортикултурно уредени и во нивните дворови е поставена соодветна урбана опрема како и лулашки и реквизити наменети за учениците од училиштата.

Со инвестиција од вкупно 4 милиони денари се изврши целосна реконструкција на овие објекти, се преградија нови училници, обновена е фасадата, санитарните јазли, заменети се ѕидните и подните облоги и набавен е соодветен училишен инвентар.

Останатите подрачни училишта се во добра состојба, а во склоп на О.О.У “Кочо Рацин” во Нов Дојран продолжува изградбата на спортската сала која треба да биде готова и предадена во функција почетокот на идната календарска година.

Капитални инвестиции во Општина Дојран

Во општината Дојран во тек се градежни активности за изградба на спортска сала во склоп на О.О.У “Кочо Рацин” Нов Дојран. Изградбата на спортската сала е инвестиција на Владата, која се реализира преку Министерството за образование и наука со поддршка од општина Дојран.

Во исто време привршува реконструкцијата и уредувањето на подрачните училишта во селата Црничани и Фурка. Конечно, учениците од прво до четврто одделение во споменатите населени места ќе имаат соодветни и достојни услови за престој и образование, а наставниот кадар ќе може професионално и во современи услови да ја спроведува предвидената училишна програма.

Приоритет во работењето на општина Дојран и понатаму остнуваат најмладите членови во општеството.   Во блиска иднина следуваат уште проекти кои ќе го подобрат живеењето и функционирањето на младите жители од Дојран и останатите населени места.