Новости

Еко акција во Стар Дојран

Во сабота на 21.09.2019та година ќе се спроведе акција за чистење и разубавување на централното градско подрачје во Стар Дојран. Сите заинтересирани граѓани, ученици, претставници од фирми, институции и граѓански организации кои сакаат да учествуваат во акцијата се поканети во 08.00 часот да дојдат на плоштадот под јаворите од каде и ќе почне акцијата.
Целта на акцијата е да се подигне свеста кај граѓаните за здрава и чиста животна средина кај сите возрасни групи и преку сопствен пример да се покаже грижа за заштита на животната средина.

Реконструкција на подрачни училишта во Општина Дојран

Подрачните објекти на основното училиште “Кочо Рацин” во селата Фурка, Николиќ и Црничани беа реконструирани, хортикултурно уредени и во нивните дворови е поставена соодветна урбана опрема како и лулашки и реквизити наменети за учениците од училиштата.

Со инвестиција од вкупно 4 милиони денари се изврши целосна реконструкција на овие објекти, се преградија нови училници, обновена е фасадата, санитарните јазли, заменети се ѕидните и подните облоги и набавен е соодветен училишен инвентар.

Останатите подрачни училишта се во добра состојба, а во склоп на О.О.У “Кочо Рацин” во Нов Дојран продолжува изградбата на спортската сала која треба да биде готова и предадена во функција почетокот на идната календарска година.

Капитални инвестиции во Општина Дојран

Во општината Дојран во тек се градежни активности за изградба на спортска сала во склоп на О.О.У “Кочо Рацин” Нов Дојран. Изградбата на спортската сала е инвестиција на Владата, која се реализира преку Министерството за образование и наука со поддршка од општина Дојран.

Во исто време привршува реконструкцијата и уредувањето на подрачните училишта во селата Црничани и Фурка. Конечно, учениците од прво до четврто одделение во споменатите населени места ќе имаат соодветни и достојни услови за престој и образование, а наставниот кадар ќе може професионално и во современи услови да ја спроведува предвидената училишна програма.

Приоритет во работењето на општина Дојран и понатаму остнуваат најмладите членови во општеството.   Во блиска иднина следуваат уште проекти кои ќе го подобрат живеењето и функционирањето на младите жители од Дојран и останатите населени места.

 

Јавен повик

Јавен повик до евидентирани невработени лица за вклучување во Програмата Општинско – корисна работа

Д Фестивал!

Бидете дел од најдобриот фестивал во регионот! Бидете дел од Д Фестивал!

Основан во 2011 година и израснат од идејата за уникатен open-air настан, кој ќе и понуди на публиката алтернатива за задоволување на потребата за летен фестивал на автентичното и прекрасно Дојранско крајбрежје – Д Фестивал веќе ја потврди и оправда иницијативата на најдобар начин. Ова е млад фестивал кој, благодарение на илјадниците фанови и најдобрите артисити од локалната, регионалната и светската музичка сцена, секоја година се одржува во одлична атмосфера константно доведувана до еуфорија и претставува единствено искуство исполнето со позитивна енергија.

Д Фестивал продолжува како традиција, но секоја година со уште поголеми очекувања, со сигурност зацврстувајќи се како симбол за незаборавно концертно доживување и традиционална дестинација за сите фанови на автентичниот дух на летните музички фестивали. Секоја година Д Фестивал е дестинацијата за забава на повеќе од 8.000 посетители кои ги уживаат впечатливите концертни перформанси на музички артисти како Manu Chao La Ventura, Stereo MC’s, Wilkinson, Sonique, Кирил Џајковски, Дубиоза Колектив, Bernays Propaganda, Љубојна, Фолтин, String Forces, Суперхикс, АРЕА, С.А.Р.С., Baildsa, Зијан и многу многу други.

Со нетрпение се очекува секое следно издание, а самиот датум на фестивалот (втората половина на јули) е сезона која секоја година е сѐ повеќе посетена од интернационални и домашни туристи и сѐ поголем број на луѓе кои веруваат во потенцијалот на Дојран. Со ширењето на добриот глас за сѐ повозбудливите фестивалски изданија, сѐ повеќе луѓе одлучуваат својот годишен летен одмор и најдобриот летен фестивалски настан да го поминат токму во Дојран. Резултатите и реакциите од минатите изданија на фестивалот, донесоа логичен прогрес да се прошири фестивалскиот обем во поглед на понудата и капацитетот.

Повеќе информации за фестивалот може да најдете на следниот линк:

Д Фестивал

Водата од Дојранското Езеро е во одлична состојба!

Најновите испитувања на водата од Дојранското Езеро покажаа дека истата е во ОДЛИЧНА СОСТОЈБА и е БЕЗБЕДНА за капење и рекреација на луѓето!

Според последните извештаи од тестирањата на здравствената безбедност на водата од Дојранското Езеро, примероци земени од Градската плажа, плажата кај хотелот “Полин” и плажата “Гранико” е докажано дека водата кај трите споменати плажи е во одлична состојба и истата може да се користи за капење и рекреација на луѓето.
Резултатите од испитувањата на езерската вода се сосема исти со минатата година, односно, резултатите ја истакнуваат нејзината непроменета одлична состојба и покажуваат параметри кои не се одразуваат штетно по здравјето на луѓето.
Во текот на летниот период неколку пати се земаат примероци од езерската вода за нејзино тестирање.
Во прилог се извештаите од стручното мислење за здравствената безбедност на водата од ЈЗУ Центар за јавно здравје – Велес.

Информација за прскање против комарци

Ве информираме дека првото авио-третирање против комарци во општините Богданци, Валандово и Дојран е планирано да се изврши на 27.06.2019 година – четврток, во раните утрински часови, односно во период од 04:30 до 09:30 часот.

Доколку временските услови не дозволат да се реализира прскањето, истото ќе се спроведе  на 28.06.2019.

Се известуваат пчеларите навремено да ги преземат потребните мерки за заштита на пчелите.

Одбележување патронен празник

Градоначалникот на општина Дојран беше поканет и присуствуваше на одбележувањето на патрониот празник на О.О.У “Кочо Рацин” во Нов Дојран.
Заедно со директорката на училиштето положија свежо цвеќе и се поклонија пред бистата на големиот Коста Солев Рацин, потоа ја проследија културно уметничката програма подготвена од учениците.
Градоначалникот Ангов додели вредносни ваучери на двајца ученици кои се натпреваруваа и освоија прво и второ место на државни натпревари и пофалници и благодарници на заслужни ученици за постигнати успеси на регионални и училишни натпревари.
Благодарност до наставниците и учениците за прекрасната организација.
Имајте успеси во иднина и бидете позитивни промотори на училиштето и на општина Дојран.

 

Обуки во општина Дојран

Општина Дојран ја имаше честа да биде домаќин на мултидисциплинарен тим на експерти и да зборува за теми кои ги засегаат најмладите членови на општеството.

Дојран беше центар за обука на ученици и наставен кадар. Имено, во основното училиште се одржа семинар на тема “Превенирање на насилното однесување меѓу учениците во онсовните училишта” и со истиот беа опфатени наставници во одделенска и предметна настава, како и стручни соработници од подрачните училишта на територијата на нашата општина.

Семинарите се реализираа благодарение на универзитетските професори: Дејан Мицковиќ (доктор по правни науки), Татјана Стојановска – Иванова (доктор по социолошки науки), Ана Фрицханд (доктор по психолошки науки) и Елизабета Томевска – Илиева (доктор по педагошки науки).Истите беа со интерактивен карактер, динамична комбинација и едукативни и за наставниците и за родителите кои присуствуваа на обуката.
Слушателите на обуката во основното училиште се здобија со знаења за правата на децата, за правните, психолошките и педагошките аспекти на насилството и малтретирањето во училиштата, како и за можноста за рано препознавање и намалување на насилството во школите.
Од страна на Институтот се одржа обука и во хотелот “Романтик”, во соработка со детската градинка “Кокиче” на тема “Ран детски развој” наменета за професионален развој на воспитувачите, родителитите и за одделенските наставници, односно за онаа група на едукатори кои ги пречекуваат децата на нивниот премин од градинка во задолжителното основно образование.

Општина Дојран изразува голема благодарност до едукаторите на настаните во образовните институции во Дојран. Со вчерашните обуки, но и оние кои ќе се спроведат во иднина – нивото на квалитет на работа во образованието ќе се издигне на повисоко ниво.
На крајот од обуките сите учесници добија сертификати за учество кои се доделија на церемонија на терасата од хотелот “Романтик” во Стар Дојран.